1Sa 7 | CopSahBible2 | STEP | ⲁⲩⲱ ⲁⲩⲉⲓ ⲛϭⲓ ⲛⲣⲱⲙⲉ ⲛⲕⲁⲣⲓⲑⲓⲁⲣⲓⲙ ⲁⲩϥⲓ ⲛⲧⲕⲟⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ ⲁⲩϫⲓⲧⲥ ⲉϩⲟⲩⲛ ⲉⲡⲏⲓ ⲛⲁⲙⲓⲛⲁⲇⲁⲃ ⲡⲉⲧϩⲛⲡⲃⲟⲩⲛⲟⲥ ⲁⲩⲱ ⲉⲗⲉⲁⲍⲁⲣ ⲡⲉϥϣⲏⲣⲉ ⲁϥⲧⲃⲃⲟϥ ⲉⲧⲣⲉϥϩⲁⲣⲉϩ ⲉⲧⲕⲟⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ

1 Samuel 7

1 ⲁⲩⲱ ⲁⲩⲉⲓ ⲛϭⲓ ⲛⲣⲱⲙⲉ ⲛⲕⲁⲣⲓⲑⲓⲁⲣⲓⲙ ⲁⲩϥⲓ ⲛⲧⲕⲟⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ ⲁⲩϫⲓⲧⲥ ⲉϩⲟⲩⲛ ⲉⲡⲏⲓ ⲛⲁⲙⲓⲛⲁⲇⲁⲃ ⲡⲉⲧϩⲛⲡⲃⲟⲩⲛⲟⲥ ⲁⲩⲱ ⲉⲗⲉⲁⲍⲁⲣ ⲡⲉϥϣⲏⲣⲉ ⲁϥⲧⲃⲃⲟϥ ⲉⲧⲣⲉϥϩⲁⲣⲉϩ ⲉⲧⲕⲟⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ 2 ⲁⲩⲱ ϫⲓⲛ ⲉⲡⲉϩⲟⲟⲩ ⲛⲧⲁⲧⲕⲟⲓⲃⲱⲧⲟⲥ ϣⲱⲡⲉ ϩⲛ ⲕⲁⲣⲓⲁⲑⲓⲁⲣⲓⲙ ⲛⲉϩⲟⲟⲩ ⲁⲩⲁϣⲁⲓ ⲁⲩⲣϫⲟⲩⲱⲧⲉ ⲛⲣⲟⲙⲡⲉ ⲁⲩⲱ ⲡⲏⲓ ⲧⲏⲣϥ ⲙⲡⲓ︤ⲏ︦ⲗ︥ ⲁⲩⲕⲧⲟⲟⲩ ⲁⲩⲟⲩⲁϩⲟⲩ ⲛⲥⲁ ⲡϫⲟⲉⲓⲥ 3 ⲥⲁⲙⲟⲩⲏⲗ ⲇⲉ ⲡⲉϫⲁϥ ⲙⲡⲏⲓ ⲧⲏⲣϥ ⲙⲡⲓ︤ⲏ︦ⲗ︥ ϫⲉ ⲉϣⲱⲡⲉ ϩⲙ ⲡⲉⲧⲛ[ϩⲏⲧ ⲧⲏⲣϥ] ⲛⲧⲱⲧⲛ [ⲧⲉ]ⲧⲛⲛⲁⲕⲉⲧⲧⲏⲩⲧⲛ ⲉⲡϫⲟⲉⲓⲥ ϥⲓ ⲙⲙⲁⲩ ⲛⲛⲉⲧⲛⲛⲟⲩⲧⲉ ⲛϣⲙⲙⲟ ⲉⲃⲟⲗ ϩⲛ ⲧⲉⲧⲛⲙⲏⲧⲉ ⲙⲛ ⲛⲉⲕⲉⲙⲁ ⲛϣⲏⲛ ⲛⲧⲉⲧⲛⲥⲟⲩⲧⲛ ⲛⲉⲧⲛϩⲏⲧ ⲉϩⲟⲩⲛ ⲉⲡϫⲟⲉⲓⲥ ⲛⲧⲉⲧⲛⲣϩⲙϩⲁⲗ ⲛⲁϥ ⲟⲩⲁⲁⲃ ⲁⲩⲱ ϥⲛⲁⲛⲉϩⲙⲧⲏⲩⲧⲛ ⲛⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ 4 ⲁⲩⲱ ⲛⲉϣⲏⲣⲉ ⲙⲡⲓ︤ⲏ︦ⲗ︥ ⲁⲩϥⲓ ⲙⲙⲁⲩ ⲛⲛⲉⲃⲁϩⲁⲗⲓⲙ ⲙⲛ ⲛⲉⲕⲉⲙⲁ ⲛϣⲏⲛ ⲛⲧⲁⲥⲧⲁⲣⲱⲑ ⲁⲩⲣϩⲙϩⲁⲗ ⲙⲡϫⲟⲉⲓⲥ ⲙⲁⲩⲁⲁϥ 5 ⲡⲉϫⲉⲥⲁⲙⲟⲩⲏⲗ ⲛⲁⲩ ϫⲉ ⲥⲱⲟⲩϩ ⲉϩⲟⲩⲛ ⲙⲡⲓ︤ⲏ︦ⲗ︥ ⲧⲏⲣϥ ⲉϩⲣⲁⲓ ⲉⲙⲁⲥⲥⲏⲫⲁⲧ ⲛⲧⲁϣⲗⲏⲗ ⲉϩⲣⲁⲓ ⲉⲡϫⲟⲉⲓⲥ ⲉϫⲱⲧⲛ 6 ⲁⲩⲥⲱⲟⲩϩ ⲇⲉ ⲧⲏⲣⲟⲩ ⲉϩⲣⲁⲓ ⲉⲙⲁⲥⲏⲫⲁⲧ ⲁⲩⲙⲉϩⲙⲟⲟⲩ ⲁⲩⲡⲱϩⲧ ϩⲁⲑⲏ ⲙⲡϫⲟⲉⲓⲥ ⲉϫⲙ ⲡⲕⲁϩ ⲁⲩⲱ ⲁⲩⲛⲏⲥⲧⲉⲩⲉ ⲙⲡⲉϩⲟⲟⲩ ⲉⲧⲙⲙⲁⲩ ⲉⲩϫⲱ ⲙⲙⲟⲥ ϫⲉ ⲁⲛⲣⲛⲟⲃⲉ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲥⲁⲙⲟⲩⲏⲗ ⲁϥϯϩⲁⲡ ⲉⲛⲉϣⲏⲣⲉ ⲙⲡⲓ︤ⲏ︦ⲗ︥ ϩⲙ ⲙⲁⲥⲏⲫⲁⲧ 7 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲥⲱⲧⲙ ϫⲉ ⲛⲉϣⲏⲣⲉ ⲧⲏⲣⲟⲩ ⲙⲡⲓ︤ⲏ︦ⲗ︥ ⲁⲩⲥⲱⲟⲩϩ ⲉⲙⲁⲥⲥⲏⲫⲁⲧ ⲁⲩⲉⲓ ⲉϩⲣⲁⲓ ⲛϭⲓ ⲛⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ⲉⲣⲱϥ ⲙⲡⲓ︤ⲏ︦ⲗ︥ ⲁⲩⲱ ⲛⲉϣⲏⲣⲉ ⲙⲡⲓ︤ⲏ︦ⲗ︥ ⲁⲩⲥⲱⲧⲙ ⲁⲩⲣϩⲟⲧⲉ ⲉⲙⲁⲧⲉ ϩⲓⲑⲏ ⲛⲛⲁⲗⲗⲟⲫⲩⲗⲟⲥ 8 ⲡⲉϫⲉⲛⲉϣⲏⲣⲉ ⲙⲡⲓ︤ⲏ︦ⲗ︥ ⲉϩⲟⲩⲛ ϩⲛ ⲥⲁⲙⲟⲩⲏⲗ ϫⲉ ⲙⲡⲉⲣⲕⲁⲣⲱⲕ ⲉϫⲱⲛ ⲛⲅϭⲱ ⲛⲟⲩⲉϣ ⲛⲱϣ ⲉϩⲣⲁⲓ ⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲅⲛⲁϩⲙⲉⲛ ⲛⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ 9 ⲁⲩⲱ ⲥⲁⲙⲟⲩⲏⲗ ⲁϥϫⲓ ⲛⲟⲩϩⲓⲉⲓⲃ ⲉϥϩⲁⲡⲉϥⲉⲣⲱⲧⲉ ⲁϥⲧⲁⲗⲟϥ ⲉϩⲣⲁⲓ ⲛⲟⲩϭⲗⲓⲗ ⲙⲛ ⲡⲗⲁⲟⲥ ⲧⲏⲣϥ ⲙⲙⲁϩ ⲙⲡϫⲟⲉⲓⲥ ⲁⲩⲱ ⲥⲁⲙⲟⲩⲏⲗ ⲁϥⲱϣ ⲉϩⲣⲁⲓ ⲉⲡϫⲟⲉⲓⲥ ⲉϫⲙ ⲡⲓ︤ⲏ︦ⲗ︥ ⲁⲡϫⲟⲉⲓⲥ ⲥⲱⲧⲙ ⲉⲣⲟϥ 10 ⲥⲁⲙⲟⲩⲏⲗ ⲇⲉ ⲛⲉϥⲧⲁⲗⲟ ⲉϩⲣⲁⲓ ⲙⲡⲉϥϭⲗⲓⲗ ⲛⲁⲗⲗⲟⲫⲩⲗⲟⲥ ϩⲱⲟⲩ ⲁⲩⲉⲓ ⲉϩⲣⲁⲓ ⲉⲣⲱϥ ⲙⲡⲓ︤ⲏ︦ⲗ︥ ⲉⲡⲟⲗⲩⲙⲉⲓ ⲛⲙⲙⲁⲩ ⲡϫⲟⲉⲓⲥ ⲇⲉ ⲁϥϯ ⲛⲟⲩϩⲣⲟⲩⲃⲁⲓ ⲙⲡⲉϩⲟⲟⲩ ⲉⲧⲙⲙⲁⲩ ϩⲛ ⲟⲩⲛⲟϭ ⲛϩⲣⲟⲟⲩ ⲉϫⲛ ⲛⲁⲗⲗⲟⲫⲩⲗⲟⲥ ⲁⲩⲱ ⲁⲩϣⲧⲟⲣⲧⲣ ⲁⲩϭⲱⲧⲡ ⲙⲡⲙⲧⲟ ⲉⲃⲟⲗ ⲙⲡⲓ︤ⲏ︦ⲗ︥ 11 ⲛϣⲏⲣⲉ ⲇⲉ ⲙⲡⲓ︤ⲏ︦ⲗ︥ ⲁⲩⲉⲓ ⲉⲃⲟⲗ ϩⲙ ⲙⲁⲥⲥⲏⲫⲁⲧ ⲁⲩⲡⲱⲧ ⲛⲥⲁ ⲛⲁⲗⲗⲟⲫⲩⲗⲟⲥ ⲁⲩϩⲓⲟⲩⲉ ⲛⲥⲱⲟⲩ ϣⲁⲛⲧⲟⲩⲉⲓ ⲉϩⲣⲁⲓ ⲉⲃⲁⲓⲑⲭⲟⲣ 12 ⲁⲩⲱ ⲥⲁⲙⲟⲩⲏⲗ ⲁϥϫⲓ ⲛⲟⲩⲱⲛⲉ ⲁϥⲧⲁϩⲟϥ ⲉⲣⲁⲧϥ ϩⲛ ⲧⲙⲏⲧⲉ ⲙⲙⲁⲥⲥⲏⲫⲁⲧ ⲁⲩⲱ ϩⲛ ⲧⲙⲏⲧⲉ ⲛⲧⲉⲧⲟⲩⲙⲟⲩⲧⲉ ⲉⲣⲟⲥ ϫⲉ ⲧⲡⲁⲗⲁⲓⲁ ⲁϥⲙⲟⲩⲧⲉ ⲉⲡⲉϥⲣⲁⲛ ϫⲉ ⲁⲃⲉⲛⲉⲍⲉⲣ ⲉⲧⲉⲡⲁⲓ ⲡⲉ ⲡⲱⲛⲉ ⲙⲡⲃⲟⲏⲑⲟⲥ ⲉϥϫⲱ ⲙⲙⲟⲥ ϫⲉ ϣⲁ ⲉϩⲣⲁⲓ ⲉⲡⲉⲓⲙⲁ ⲁⲡϫⲟⲉⲓⲥ ⲃⲟⲏⲑⲉⲓ ⲉⲣⲟⲛ 13 ⲁⲩⲱ ⲡϫⲟⲉⲓⲥ ⲁϥⲑⲃⲃⲓⲟ ⲛⲛⲁⲗⲗⲟⲫⲩⲗⲟⲥ ⲙⲡⲟⲩⲱϩ ⲉⲧⲟⲟⲧⲟⲩ ⲉⲉⲓ ⲉϫⲛ ⲛⲉⲧⲟϣ ⲙⲡⲓ︤ⲏ︦ⲗ︥ ⲁⲩⲱ ⲧϭⲓϫ ⲙⲡϫⲟⲉⲓⲥ ⲁⲥϣⲱⲡⲉ ⲉϫⲛ ⲛⲁⲗⲗⲟⲫⲩⲗⲟⲥ ⲛⲛⲉϩⲟⲟⲩ ⲧⲏⲣⲟⲩ ⲛⲥⲁⲙⲟⲩⲏⲗ 14 ⲁⲩⲱ ⲙⲡⲟⲗⲓⲥ ⲛⲧⲁⲛⲁⲗⲗⲟⲫⲩⲗⲟⲥ ϥⲓⲧⲟⲩ ⲛⲧⲟⲟⲧⲟⲩ ⲛⲛϣⲏⲣⲉ ⲙⲡⲓ︤ⲏ︦ⲗ︥ ϫⲓⲛ ⲁⲥⲕⲁⲗⲱⲛ ϣⲁ ⲉϩⲣⲁⲓ ⲉⲁⲍⲟⲃ ⲁⲩⲱ ⲡⲧⲟϣ ⲙⲡⲓ︤ⲏ︦ⲗ︥ ⲁⲩϥⲓⲧϥ ⲛⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ ⲛⲉⲣⲉⲟⲩⲉⲓⲣⲏⲛⲏ ⲇⲉ ϣⲟⲟⲡ ϩⲛ ⲧⲙⲏⲧⲉ ⲛⲛϣⲏⲣⲉ ⲙⲡⲓ︤ⲏ︦ⲗ︥ ⲁⲩⲱ ϩⲛ ⲧⲙⲏⲧⲉ ⲙⲡⲁⲙⲟⲣⲣⲁⲓⲟⲥ 15 ⲁⲩⲱ ⲥⲁⲙⲟⲩⲏⲗ ⲁϥϯϩⲁⲡ ⲉⲡⲓ︤ⲏ︦ⲗ︥ ⲛⲛⲉϩⲟⲟⲩ ⲧⲏⲣⲟⲩ ⲙⲡⲉϥⲱⲛϩ 16 ⲁϥⲕⲱⲧⲉ ⲉⲃⲁⲓⲑⲏⲗ ⲙⲛ ⲅⲁⲗⲅⲁⲗⲁ ⲙⲛ ⲙⲁⲥⲥⲏⲫⲁⲧ ⲉϥϯϩⲁⲡ ⲉⲡⲓ︤ⲏ︦ⲗ︥ ϩⲛ ⲛⲙⲁ ⲧⲏⲣⲟⲩ ⲉⲧⲧⲃⲃⲏⲩ 17 ⲡⲉϥⲙⲁ ⲛⲉⲥⲑⲁ ⲇⲉ ⲡⲉ ⲁⲣⲙⲁⲑⲁⲉⲓⲙ ⲉⲃⲟⲗ ϫⲉ ⲛⲉⲣⲉⲡⲉϥⲏⲓ ⲙⲙⲁⲩ ⲁⲩⲱ ⲛⲉϥϯϩⲁⲡ ⲉⲡⲓ︤ⲏ︦ⲗ︥ ϩⲙ ⲡⲙⲁ ⲉⲧⲙⲙⲁⲩ ⲁⲩⲱ ⲁϥⲕⲱⲧ ϩⲙ ⲡⲙⲁ ⲉⲧⲙⲙⲁⲩ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲙⲡϫⲟⲉⲓⲥ